|
49 Wanderer, 1 Kleinkind, 8 (leider verhinderte)
Wanderer und 2 Hunde
Am 19. Novämber isch es wieder sowiit gsi – Metzgete 2005 – under de
Füehrig vom André Ritler isch duregfüehrt worde. Für ihn isches schiints,
us taktische Gründ g’rächnet, erscht di 29. gsi.
Besammled händ sich am halbidrü, bi schönstem Herbschtwätter,
ca. 49 Persone (+1 Chlichind), vor em Kiosk am HB Winti Nord. s’Ziel,
wiä immer, irgendwo im Hinderchopf vom André.
Mit der S26 isch es dänn losgange, aber chuum isch mer abgsässe häd mer
im Sännhof scho wieder muesse usstiige. Zerscht isch es wieder z’rugg
gange, Richtig Eschebärg, parallel de Bahn und der Hauptstraas na.
D’Hauptstraas hämmer dänn gli wieder überquert (fascht wie d’Hüehner)
Richtig Weierhöchi - Gotzewil. Am Rand vo Gotzewil, äs Stuck uf de
Hauptstraas Richtig Eidberg… aber plötzlich wieder en Rächtsschwänker
und scho wieder übers Fäld zum Wiiler TAA, anschiinend weiss niemer wie
me de Ort schriibe söll. (Taa, Tha, Thaa oder Ta). – Zu eusere grosse
Überraschig händ eus hie d’Bettina und d’Marianne (zwei aktivi
Kajakerinne) en feine Apéro offeriert und serviert. Dä hät Iidruck
g’macht und natürli grosse Aaklang g’funde. Nomal ganz härzliche Dank .
Nach enere Pause vo guet er halbe Stund, simmer dänn guet g’luunt – i
de Zwüschezyt hät au de André g’schnallt wo’s ane gaht – und
begleitet vomene wunderschöne Sunneuntergang wiiter ins Chlösterli Iberg
ans Ziel g’wanderet.
Hungrig und au es bizeli müed hämmer eus im Restaurantsäli breit g’macht
und g’wartet und g’wartet uf de gueti z’Nacht. Guet isch gsi, dass
s’Warte mit Musikbegleitig ag’nähmer gmacht worde isch, vo eusem
Mitglied em Schorsch. Aber s’Warte hät sich g’lohnt, denn s’Ässe isch
würkli guet gsi. Witz und Gschichtli sind au verzellt worde und sogar en
chline Schätz-Wettbewerb häts no gä. Als erschte Priis isch en «sofort
iisatzbereiti Huushalthilf» z’gwünne gsi.
Nid allzu spat am Abig simmer dänn – mehr oder weniger gmeinsam –
satt und z’friede no z’Fuess zum Bus abe uf Oberseen marschiert.
Ich möcht em André für die g’lungni Metzgete-Wanderig no emal härzlich
danke.
|